ମଧ୍ୟ ପ୍ରଦେଶର ବାଲାଘାଟ ଲୋକସଭା ଆସନରୁ ବିଏସ୍ପି ଟିକେଟରେ ପ୍ରାର୍ଥୀ ହୋଇଥିବା କଙ୍କର ମୁଞ୍ଜାରେ ତାଙ୍କ ଘର ଛାଡ଼ି ଦେଇଛନ୍ତି। ଭୋଟ୍ ନପଡ଼ିବା ପର୍ଯ୍ୟନ୍ତ ସେ ଘରକୁ ଫେରିବେ ନାହିଁ ବୋଲି କହିଛନ୍ତି। ତାଙ୍କ ପତ୍ନୀ ଅନୁଭା ମୁଞ୍ଜାରେ କଂଗ୍ରେସ ବିଧାୟିକା ହୋଇଥିବାରୁ ସେ ଏଭଳି ଏକ ପଦକ୍ଷେପ ନେଇଥିବା କହିଛନ୍ତି।
କଙ୍କର ମୁଞ୍ଜାରେ କହିଛନ୍ତି, ଆମେ ଦୁଇ ଜଣ ଭିନ୍ନ ଭିନ୍ନ ଆଦର୍ଶକୁ ଅନୁକରଣ କରୁଛୁ। ତେଣୁ ନିର୍ବାଚନ ବେଳେ ଦୁହେଁ ଆଦୌ ଗୋଟିଏ ଛାତ ତଳେ ରହିବା କଥା ନୁହେଁ। ନହେଲେ ଲୋକେ କହିବେ ଏ ସବୁ କିଛି ଫିକ୍ସିଂ। ମୁଁ ଶୁକ୍ରବାର ଘର ଛାଡ଼ି ଦେଇଛି। ଏବେ ଡ୍ୟାମ୍ ନିକଟରେ ଏକ କୁଡ଼ିଆରେ ରହୁଛି। ଏପ୍ରିଲ ୧୯ ତାରିଖରେ ଭୋଟ୍ ଗ୍ରହଣ ଶେଷ ହେବା ପରେ ମୁଁ ଘରକୁ ଫେରିବି।
କଙ୍କର ମୁଞ୍ଜାରେ ହେଉଛନ୍ତି ଜଣେ ପୂର୍ବତନ ବିଧାୟକ ଓ ସାଂସଦ। ତାଙ୍କ ପତ୍ନୀ ଅନୁଭା ମୁଞ୍ଜାରେ ୨୦୨୩ ବିଧାନସଭା ନିର୍ବାଚନରେ ବିଜେପିର ଜଣେ ବଡ଼ ନେତା ତଥା ୭ ଥର ବିଧାୟକ ହୋଇଥିବା ଗୌରୀଶଙ୍କର ବିସେନଙ୍କୁ ପରାସ୍ତ କରିଥିଲେ।
Also Read
ଅନୁଭା କହିଛନ୍ତି, ସ୍ୱାମୀଙ୍କ ଏଭଳି ପଦକ୍ଷେପ ମୋତେ ଆଘାତ ଦେଇଛି। ଗତବର୍ଷ ସେ (କଙ୍କର ମୁଞ୍ଜାରେ) ଯେତେବେଳେ ପରସୱାଡ଼ାରୁ ଗୋଣ୍ଡୱାନା ଗଣତନ୍ତ୍ର ପାର୍ଟି ଟିକେଟରେ ନିର୍ବାଚନ ଲଢ଼ୁଥିଲେ ମୁଁ କଂଗ୍ରେସ ଟିକେଟରେ ବାଲାଘାଟରୁ ନିର୍ବାଚନ ଲଢ଼ିଥିଲି। କିନ୍ତୁ ଆମେ ଏକାଠି ରହୁଥିଲୁ। ଆମେ ୩୩ ବର୍ଷ ତଳେ ବାହା ହୋଇଥିଲୁ। ଆମର ଗୋଟିଏ ପୁଅ ଅଛି। ଆମେ ଖୁସିରେ ଘରେ ରହୁ।
ଅନୁଭା ଆହୁରି କହିଛନ୍ତି ଯେ ସେ କଂଗ୍ରେସର ଜଣେ ବିଶ୍ୱସ୍ତ କର୍ମକର୍ତ୍ତା। ଏଥର ବାଲାଘାଟ ଲୋକସଭା ଆସନରୁ କଂଗ୍ରେସ ପ୍ରାର୍ଥୀ ସମ୍ରାଟ ସାରସ୍ୱତ ଯେପରି ନିର୍ବାଚନ ଜିତିବେ ସେଥିପାଇଁ ପୂରା ପ୍ରୟାସ କରାଯିବ। ତାଙ୍କ ସ୍ୱାମୀ କଙ୍କର ମଞ୍ଜାରେ ଏହି ଆସନରୁ ପ୍ରାର୍ଥୀ ହୋଇଥିଲେ ହେଁ ଅନୁଭା ଏଭଳି କଥା କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
