ସାମ୍ନାକୁ ଆସିଛି ଅତ୍ୟନ୍ତ ବିଚଳିତ କରିବା ଭଳି ଘଟଣା। ବାପା କୋଳରେ ଶୋଇଥିବା ବର୍ଷକର ପୁଅକୁ ଘୋଷାଡ଼ି ନେଇ ମାରି ଖାଇ ଦେଇଛନ୍ତି କିଛି ବୁଲା କୁକୁର। ତେଲେଙ୍ଗାନାର ଶାମଶାବାଦରେ ଗୁରୁବାର ଭୋର ସମୟରେ ଏପରି ଲୋମହର୍ଷଣକାରୀ ଘଟଣା ଘଟିଛି।
ପିଲାଟି ବାପାଙ୍କ ସହ ମାଟି ଘର ଭିତରେ ଶୋଇଥିବା ବେଳେ ବୁଲା କୁକୁରମାନେ ଏପରି କାଣ୍ଡ ଘଟାଇଛନ୍ତି। ବୁଲା କୁକୁରମାନେ ପିଲାଟିକୁ ଖାଉଥିବା ସ୍ଥାନୀୟ ଲୋକ ଦେଖିବା ପରେ ପୁଲିସ୍କୁ ଖବର ଦେଇଥିଲେ। ଏହାପରେ ପୂରା ଘଟଣା ସାମ୍ନାକୁ ଆସିଛି।
Also Read
ଏହାକୁ ମିଶାଇ ଗତବର୍ଷ ମାର୍ଚ୍ଚ ମାସରୁ ଇତି ମଧ୍ୟରେ ଏପରି ୯ଟି ଘଟଣା ଘଟିଲାଣି। ଆରଜିଆଇ ଏୟାରପୋର୍ଟ ଇନସପେକ୍ଟର କେ ବାଲାରାଜୁ କହିଛନ୍ତି ଯେ ପିଲାଟିର ବାପା କେ ସୂର୍ଯ୍ୟ କୁମାର ଏନେଇ ଅଭିଯୋଗ କରିଛନ୍ତି। ଏହାକୁ ଆଧାର କରି ପୁଲିସ ତଦନ୍ତ ଆରମ୍ଭ କରିଛି।
ଶ୍ରମିକ ଭାବେ କାମ କରୁଥିବା ସୂର୍ଯ୍ୟ କୁମାର ରାଜୀବ ଗୃହକଳ୍ପ କମ୍ପ୍ଲେକ୍ସ ନିକଟରେ ମାଟି ଘର କରି ରୁହନ୍ତି। ବୁଧବାର ରାତିରେ ସେ ତାଙ୍କର ବର୍ଷକର ବଡ଼ ପୁଅ କେ ନାଗାର୍ଜୁନ, ୨୦ ଦିନର ନବଜାତ ପୁଅ ଓ ପରିବାରର ଅନ୍ୟ ସଦସ୍ୟଙ୍କ ସହ ମାଟି ଘରେ ଶୋଇଥିଲେ। ତେବେ ଘଟଣା ବେଳେ ସୂର୍ଯ୍ୟ କୁମାରଙ୍କ ପତ୍ନୀ ଘରେ ନଥିଲେ।
ରାତି ପ୍ରାୟ ୧.୩୦ରେ ସ୍ଥାନୀୟ ଲୋକମାନେ ସୂର୍ଯ୍ୟ କୁମାରଙ୍କୁ ନିଦରୁ ଉଠାଇଥିଲେ। ସେମାନେ ହିଁ ତାଙ୍କୁ କହିଥିଲେ ଯେ ବୁଲା କୁକୁରମାନେ ଗୋଟିଏ ଛୁଆକୁ ଖାଉଛନ୍ତି। ଖବର ପାଇ ସେ ତୁରନ୍ତ ଘଟଣାସ୍ଥଳକୁ ଦୌଡ଼ିଥିଲେ। ହେଲେ ସେତେବେଳକୁ ବର୍ଷକର ନାଗାର୍ଜୁନ ପ୍ରାଣ ହରାଇ ସାରିଥିଲେ। ସେ ପୂରା ନିସ୍ତେଜ ହୋଇ ତଳେ ପଡ଼ିଥିବା ବେଳେ ତାଙ୍କ ଶରୀରକୁ କୁକୁରମାନେ ଝୁଲି ସାରିଥିଲେ।
ସୂର୍ଯ୍ୟ କୁମାର ପୁଲିସ୍କୁ କହିଛନ୍ତି ଯେ “ଆମେ ନାଗାର୍ଜୁନଙ୍କୁ କ୍ଷୀର ଦେଉଥିଲୁ ଓ ସମସ୍ତେ ରାତି ପ୍ରାୟ ୧୨.୧୫ରେ ଶୋଇବା ପାଇଁ ଯାଇଥିଲୁ। ସେହି ସମୟରେ ଏମିତି କିଛି ଘଟଣା ଘଟିବ ବୋଲି ଆମର ଧାରଣା ହିଁ ନଥିଲା।”
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
