ବାଜି ସାରିଛି ନିର୍ବାଚନୀ ବିଗୁଲ। ଦେଶରେ ବର୍ତ୍ତମାନ ନିର୍ବାଚନୀ ମାହୋଲ ଜାରି ରହିଛି। ଏହାରି ଭିତରେ ଇଭିଏମ୍ ଓ ଭିଭିପାଟ୍କୁ ନେଇ କେନ୍ଦ୍ର ସରକାର ଓ ନିର୍ବାଚନ ଆୟୋଗଙ୍କୁ ନୋଟିସ କରିଛନ୍ତି ସୁପ୍ରିମକୋର୍ଟ। ନୋଟିସ ଜାରି କରି ଉଭୟଙ୍କଠାରୁ ଜବାବ ମାଗିଛନ୍ତି।
ପ୍ରକୃତରେ ଲୋକସଭା ନିର୍ବାଚନ ଫଳାଫଳ ପାଇଁ ଇଭିଏମ୍ ସମେତ ଭିଭିପାଟ ସ୍ଲିପ୍ ଗଣାଯିବାକୁ ନେଇ ସାମାଜିକ କର୍ମୀ ଅରୁଣ କୁମାର ଅଗ୍ରଓ୍ୱାଲ ସୁପ୍ରିମକୋର୍ଟରେ ଆବେଦନ କରିଥିଲେ। ଜଷ୍ଟିସ ବିଆର୍ ଗଓ୍ୱଇ ଓ ଜଷ୍ଟିସ ସନ୍ଦିପ ମେହତାଙ୍କ ଖଣ୍ଡପୀଠ ଏହି ମାମଲାର ଶୁଣାଣି କରି ନିର୍ବାଚନ ଆୟୋଗ ଓ କେନ୍ଦ୍ର ସରକାରଙ୍କୁ ନୋଟିସ ଜାରି କରିଛନ୍ତି। ଇଭିଏମ୍ ସମେତ ସମସ୍ତ ଭିଭିପାଟ ସ୍ଲିପ ଗୁଡ଼ିକୁ ଗଣାଯିବା ନେଇ ଜବାବ ମାଗିଛନ୍ତି। ଆସନ୍ତା ମେ' ୧୭ ତାରିଖରେ ଏହି ମାମଲାର ପରବର୍ତ୍ତୀ ଶୁଣାଣି ହେବ।
ସୁପ୍ରିମକୋର୍ଟରେ ଦାଖଲ ହୋଇଥିବା ଆବେଦନରେ ନିର୍ବାଚନ ଆୟୋଗର ଏ ସଂକ୍ରାନ୍ତ ନିୟମକୁ ଚ୍ୟାଲେଞ୍ଜ କରାଯାଇଛି। VVPAT ଯାଞ୍ଚ ପର୍ଯ୍ୟାୟ ଭାବରେ କରାଯିବା, ଅର୍ଥାତ୍ ଗୋଟିଏ ପରେ ଗୋଟିଏ ଯାଞ୍ଚ କରାଯିବା ଯୋଗୁ ଏଥିରେ ଅଯଥା ବିଳମ୍ବ ଘଟୁଛି। ତେଣୁ ଆବେଦନକାରୀ ଏକାସାଙ୍ଗରେ ଯାଞ୍ଚ କରିବା ଏବଂ ଗଣତିକୁ ତ୍ୱରାନ୍ୱିତ କରିବାକୁ ଅଧିକ କର୍ମଚାରୀ ରଖିବା ପାଇଁ ପରାମର୍ଶ ଦେଇଛନ୍ତି। ଏଭଳି କରିବା ଦ୍ୱାରା ପ୍ରତ୍ୟେକ ଅଞ୍ଚଳରେ ପ୍ରାୟ ୫ରୁ୬ ଘଣ୍ଟା ସମୟରେ କାମ ଶେଷ ହେବ ବୋଲି ସେ କହିଛନ୍ତି। ଏବେ ଚାଲିଥିବା ନିୟମ ଅନୁଯାୟୀ ଗୋଟିଏ ସଂସଦୀୟ କ୍ଷେତ୍ରରେ ଥିବା ପ୍ରତ୍ୟେକ ବିଧାନସଭା କ୍ଷେତ୍ରର ମାତ୍ର ପାଞ୍ଚଟି ଲେଖାଏଁ ଇଭିଏମର ଭିଭିପାଟ୍ ଯାଞ୍ଚ ହେଉଛି। ଆବେଦନକାରୀ ସମସ୍ତ ଇଭିଏମର ଭିଭିପାଟ୍ ଯାଞ୍ଚ କରିବାକୁ ଦାବି କରିଛନ୍ତି।
ସମସ୍ତ ଭିଭିପାଟ ସ୍ଲିପ୍ ଯାଞ୍ଚ ବା ଗଣତି କରି ଭୋଟର ଦେଇଥିବା ଭୋଟକୁ ବାଧ୍ୟତାମୂଳକ ଭାବେ କ୍ରସ୍ ଚେକିଂ କରିବା ପାଇଁ ଇସିଆଇ ନିର୍ଦ୍ଦେଶ ଦିଅନ୍ତୁ ବୋଲି ଆବେଦନରେ ଦାବି ହୋଇଛି। କେବଳ ସେତିକି ନୁହେଁ ଭୋଟରଙ୍କୁ ବ୍ୟକ୍ତିଗତ ରୂପେ VVPATରୁ ବାହାର କରାଯାଇଥିବା ସ୍ଲିପକୁ ଏକ ସ୍ୱଚ୍ଛ ବାଲାଟ ବକ୍ସରେ ପକାଇବାକୁ ଅନୁମତି ଦେବାକୁ ନିର୍ବାଚନ ଆୟୋଗଙ୍କୁ ନିର୍ଦ୍ଦେଶ ଦେବାକୁ ଦାବି କରାଯାଇଛି।
ସରକାର ପ୍ରାୟ ସରକାର ପ୍ରାୟ ୨୪ ଲକ୍ଷ VVPAT କିଣିବା ପାଇଁ ପ୍ରାୟ ୫ ହଜାର କୋଟି ଟଙ୍କା ଖର୍ଚ୍ଚ କରିଛନ୍ତି, କିନ୍ତୁ ବର୍ତ୍ତମାନ ମାତ୍ର ୨୦,୦୦୦ VVPAT ସ୍ଲିପ୍ ଯାଞ୍ଚ କରାଯାଇଛି। ତେଣୁ ସମସ୍ତ VVPAT ସ୍ଲିପ୍ ଯାଞ୍ଚ କରିବାକୁ ସେ ନିଜ ଆବେଦନରେ ଅନୁରୋଧ କରିଛନ୍ତି।
ସୂଚନାଯୋଗ୍ୟ ଯେ ବର୍ତ୍ତମାନ ପରିସ୍ଥିତିରେ, VVPAT ସ୍ଲିପ୍ ମାଧ୍ୟମରେ ଯେକୌଣସି ପାଞ୍ଚଟି ମନୋନୀତ ଇଭିଏମ୍ ଯାଞ୍ଚ କରାଯିବା ନିୟମ ରହିଛି। ବାସ୍ତବରେ, VVPAT ହେଉଛି ଏକ ସ୍ୱତନ୍ତ୍ର ଭୋଟ୍ ଯାଞ୍ଚ ପ୍ରଣାଳୀ, ଯାହା ଭୋଟରଙ୍କୁ ତାଙ୍କ ଭୋଟ୍ ସଠିକ୍ ଭାବରେ କାଷ୍ଟ ହୋଇଛି କି ନାହିଁ ଦେଖିବା ପାଇଁ ଅନୁମତି ଦେଇଥାଏ।