ରାଜ୍ୟ ସରକାର ଆଜି ଆଇପିଏସ ଅଫିସରସ୍ତରରେ ଛୋଟଧରଣର ବଦଳି କରିଛନ୍ତି । ମୟୂରଭଞ୍ଜ ଏସପି ୨୦୧୧ ବ୍ୟାଚ୍ ଆଇପିଏସ୍ ବି ଗଙ୍ଗାଧରଙ୍କୁ ରାଜ୍ୟ ପୁଲିସ ମୁଖ୍ୟାଳୟକୁ ବଦଳି କରାଯାଇଛି । ସେ ଗତ ୬ମାସ ତଳେ ସମ୍ବଲପୁରରୁ ମୟୂରଭଞ୍ଜ ଏସପି ଭାବେ ବଦଳି ହୋଇଥିଲେ । ଜଣେ ଏସପିଙ୍କୁ ମାତ୍ର ୬ମାସରେ ଅଚାନକ ବଦଳି କରିବାକୁ ନେଇ ପୁଲିସ ପ୍ରଶାସନରେ ଚର୍ଚ୍ଚା ଜୋର ଧରିଛି ।
ରାଜ୍ୟ ଗୃହ ବିଭାଗର ବିଜ୍ଞପ୍ତି ଅନୁସାରେ, ୨୦୧୧ ବ୍ୟାଚ୍ ଆଇପିଏସ୍ ମୟୂରଭଞ୍ଜ ଏସପି ବି ଗଙ୍ଗାଧରଙ୍କୁ ରାଜ୍ୟ ପୁଲିସ ମୁଖ୍ୟାଳୟକୁ ବଦଳି ହୋଇଛି। ସେହିପରି ନବରଙ୍ଗପୁର ଏସପି ୨୦୧୮ ବ୍ୟାଚର ଆଇପିଏସ୍ ଏସ୍ ସୁଶ୍ରୀଙ୍କୁ ମୟୂରଭଞ୍ଜ ଏସପି ଭାବେ ନିଯୁକ୍ତି ମିଳିଛି । ସେହିପରି ବାଲିଗୁଡ଼ା ଏସଡିପିଓ ଭାବେ କାର୍ଯ୍ୟରତ ୨୦୧୯ ବ୍ୟାଚ୍ ଆଇପିଏସ୍ ରୋହିତ ବର୍ମାଙ୍କୁ ପଦୋନ୍ନତି ଦେଇ ନବରଙ୍ଗପୁର ଏସପି ଭାବେ ବଦଳି ହୋଇଛି।
Also Read
ମୟୂରଭଞ୍ଜ ପୁଲିସ ଏସପି ଗଙ୍ଗାଧରଙ୍କୁ କାହିଁକି ଅଚାନକ ସରକାର ବଦଳି କଲେ ତାହା ଜଣାପଡ଼ିନି । ସମ୍ବଲପୁରରେ ଏସପି ଥିବାବେଳେ ସେ ରାଜ୍ୟ ସରକାରଙ୍କ ଗେହ୍ଲାପୁଅ ସାଜିଥିଲେ । ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କ ବିରୁଦ୍ଧରେ ମାମଲା ଓ ଅନ୍ୟାନ୍ୟ ଘଟଣାରେ ସେ ସରକାରଙ୍କ ଇସାରାରେ କାର୍ଯ୍ୟ କରି ମୟୂରଭଞ୍ଜ ଭଳି ବଡ଼ ଜିଲ୍ଲାର ଏସପି ଭାବେ ପୁରସ୍କୃତ ହୋଇଥିଲେ । ଗତ ମେ’ ୧୮ତାରିଖରେ ରାଜ୍ୟ ସରକାର ତାଙ୍କୁ ସମ୍ବଲପୁରରୁ ମୟୂରଭଞ୍ଜକୁ ବଦଳି କରିଥିଲେ । ମାତ୍ର ମୟୂରଭଞ୍ଜ ଜିଲ୍ଲାରେ ତାଙ୍କର ୬ମାସ ନପୁରୁଣୁ ଆଜି ପୁଣିଥରେ ବଦଳି ହୋଇଛି ।
ସାଧାରଣ ନିର୍ବାଚନ ପୂର୍ବରୁ ଗଙ୍ଗାଧରଙ୍କ ଉପରେ ଏଭଳି କାର୍ଯ୍ୟାନୁଷ୍ଠାନ ପଛରେ କାରଣ ଜଣାପଡ଼ିନି । ରାଜ୍ୟରେ ପୁଲିସ ଏସପି ପାହ୍ୟାର ବଦଳି ଓ ନିଯୁକ୍ତି ସଂକ୍ରାନ୍ତ ନିଷ୍ପତ୍ତି ନେବା ପାଇଁ ପୁଲିସ ଏଷ୍ଟାବ୍ଲିସମେଂଟ ବୋର୍ଡ ନଥିବାରୁ ରାଜ୍ୟ ସରକାର ମନମୁଖୀ ପୁଲିସ ଏସପି ବଦଳି କରୁଥିବା ଜଣାପଡ଼ିଛି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
