ଗ୍ରାମାଂଚଳରେ ‘ଆମ ଓଡ଼ିଶା ନବୀନ ଓଡ଼ିଶା’ ଯୋଜନାରେ ପ୍ରତି ପଂଚାୟତକୁ ୫୦ଲକ୍ଷ ଟଙ୍କା ଦେଇଥିବା ରାଜ୍ୟ ସରକାର ଏବେ ସହରାଂଚଳରେ ଏହି ଯୋଜନାକୁ କାର୍ଯ୍ୟକାରୀ ପାଇଁ ନିଷ୍ପତ୍ତି ନେଇଛନ୍ତି । ଆସନ୍ତା ୨୨ତାରିଖରୁ ଫେବୃୟାରୀ ୭ତାରିଖ ମଧ୍ୟରେ ସହରାଂଚଳରେ ଏହି କାର୍ଯ୍ୟକ୍ରମ ହେବ । ଏଥିପାଇଁ ପାଣ୍ଠି ଜାଗା ମିଶନରୁ(ଯେଉଁ ସହରରେ ବସ୍ତି ଥିବ) ଓ ବସ୍ତି ନଥିଲେ ‘ଉନ୍ନତି’ ଯୋଜନାରୁ ଖର୍ଚ୍ଚ ହେବ । ଫାଇଭ-ଟି ପଦକ୍ଷେପ ଅନ୍ତର୍ଗତ ଯେଉଁସବୁ ଯୋଜନା ଓ କାର୍ଯ୍ୟକ୍ରମ କାର୍ଯ୍ୟକାରୀ ହେଉଛି ସେଥିପାଇଁ କ୍ୟାମ୍ପେନ୍ ମୋଡରେ ‘ଆମ ଓଡ଼ିଶା ନବୀନ ଓଡ଼ିଶା(ସହରାଂଚଳ)’ କାର୍ଯ୍ୟକ୍ରମରେ ସଚେତନତା କରାଯିବ । ଏଭଳି ଗାଇଡଲାଇନ୍ ଗତକାଲି ରାଜ୍ୟ ଗୃହନିର୍ମାଣ ଓ ନଗର ଉନ୍ନୟନ ବିଭାଗ ପକ୍ଷରୁ ଜାରି ହୋଇଛି ।
ବିଭାଗର ଅତିରିକ୍ତ ମୁଖ୍ୟ ସଚିବ ଜି ମାଥିଭାଥାନନ୍ ଗତକାଲି ଏହି ଗାଇଡଲାଇନ୍ ଜାରି କରି ‘ଆମ ଓଡ଼ିଶା ନବୀନ ଓଡ଼ିଶା(ସହରାଂଚଳ) ଅନ୍ତର୍ଗତ ରାଜ୍ୟସ୍ତରୀୟ ସଚେତନା କାର୍ଯ୍ୟକ୍ରମ ଆୟୋଜନ କରିବାକୁ ପରାମର୍ଶ ଦେଇଛନ୍ତି । ଏହି ସଚେତନତା କାର୍ଯ୍ୟକ୍ରମ ଅନ୍ତର୍ଗତ ବିଭିନ୍ନ ଶିବିର ଆୟୋଜନ କରି ସରକାରଙ୍କ ଦ୍ୱାରା ବିଭିନ୍ନ ଯୋଜନା ଓ କାର୍ଯ୍ୟକ୍ରମର ଯୋଗ୍ୟ ହିତାଧିକାରୀଙ୍କୁ ତା’ର ଫାଇଦା ସୁନିଶ୍ଚିତ କରାଇôାକୁ ପରାମର୍ଶ ଦେଇଛନ୍ତି । ଏଥିପାଇଁ ଜାନୁୟାରୀ ୨୨ରୁ ଫେବୃୟାରୀ ୭ତାରିଖ ପର୍ଯ୍ୟନ୍ତ ସମସ୍ତ ସହରାଂଚଳରେ ସଚେତନତା ଶିବିର ଆୟୋଜନ କରାଯିବ । ବିଭାଗ ଦ୍ୱାରା ଜାରି ଗାଇଡଲାଇନ୍ ଅନୁସାରେ ସମସ୍ତ ପୌରାଚଂଳ ଦ୍ୱାରା ସଚେତନତା ଶିବିର ସହରାଚଂଳ ବିକାଶ ସଂସ୍ଥା (ଡୁଡା) ଦ୍ୱାରା ପ୍ରସ୍ତୁତ କ୍ୟାଲେଣ୍ଡର ଅନୁଯାୟୀ ସମସ୍ତ ୱାର୍ଡକୁ ଅନ୍ତର୍ଭୁକ୍ତ କରାଯିବ । ଆଉ ବିଭିନ୍ନ ଯୋଜନା ଓ କାର୍ଯ୍ୟକ୍ରମ ଅନ୍ତର୍ଗତ ହିତାଧିକାରୀଙ୍କୁ ତା’ର ଫାଇଦା ସ୍ୱଚ୍ଛତାର ସହ ମଧ୍ୟ ପ୍ରଦାନ କରାଯିବ । ସାମାଜିକ କର୍ମୀ ଓ ସ୍ୱେଚ୍ଛାସେବୀମାନେ ଏହି କାର୍ଯ୍ୟକ୍ରମରେ ସହଯୋଗ ପାଇଁ ନିୟୋଜିତ ହେବେ । ସେଥିପାଇଁ ପୌରାଚଂଳ ଓ ଜିଲ୍ଲା ସହରାଚଂଳ ବିକାଶ ସଂସ୍ଥା(ଡୁଡା) ଏସବୁ ଶିବିରଗୁଡ଼ିକର କାର୍ଯ୍ୟସୂଚୀ ପ୍ରସ୍ତୁତ କରି ଆସନ୍ତାକାଲି ଅର୍ଥାତ୍ ୨୦ତାରିଖ ସୁଦ୍ଧା ପୌର ପ୍ରଶାସକ ନିର୍ଦ୍ଦେଶକଙ୍କୁ ପଠାଇବେ ।
Also Read
ଏହି ସଚେତନତା ଶିବିର ଆୟୋଜନ ପାଇଁ ବସ୍ତି ନଥିବା ଅଂଚଳରେ ୬୫ହଜାର ଟଙ୍କା(ଉନ୍ନତି ସ୍କିମରୁ ଖର୍ଚ୍ଚ ହେବ) ଓ ବସ୍ତି ଥିବା ଅଂଚଳରେ ଜାଗା ମିଶନରୁ ଖର୍ଚ୍ଚ କରିବାକୁ ଗାଇଡଲାଇନରେ ଉଲ୍ଲେଖ ରହିଛି। ଶିବିର ଆୟୋଜନ ଓ ସମସ୍ତ କାର୍ଯ୍ୟକ୍ରମର ଭିଡିଓଗ୍ରାଫି ଓ ଦସ୍ତାବିଜ ପ୍ରସ୍ତୁତ ପାଇଁ ନିର୍ଦ୍ଦେଶ ଦିଆଯାଇଛି।
ତେବେ ପ୍ରଶ୍ନ ଉଠୁଛି, ଯଦି ରାଜ୍ୟସ୍ତରୀୟ ସଚେତନତା ଶିବିର ପାଇଁ ଖର୍ଚ୍ଚ ହେବାକୁ ଥିବା ପାଣ୍ଠି ଜାଗା ମିଶନ ଓ ଉନ୍ନତି ଯୋଜନାରୁ ଖର୍ଚ୍ଚ ହେବ ତା’ହେଲେ ଆମ ଓଡ଼ିଶା ନବୀନ ଓଡ଼ିଶା(ସହରାଂଚଳ) ନାଁ ସରକାର କାହିଁକି ଦେଇଛନ୍ତି । କାହାକୁ ବିଭ୍ରାନ୍ତ କରିବାକୁ ସରକାର ଚାହୁଁଛନ୍ତି? ଗ୍ରାମାଂଚଳ ଭଳି ସହରାଂଚଳ ପାଇଁ ‘ଆମ ଓଡ଼ିଶା ନବୀନ ଓଡ଼ିଶା’ ଯୋଜନାରେ ସ୍ୱତନ୍ତ୍ର ଅର୍ଥ ବ୍ୟୟବରାଦ କରିବାରେ ସମସ୍ୟା କେଉଁଠି ରହିଛି, ତାକୁ ନେଇ ସାଧାରଣରେ ଚର୍ଚ୍ଚା ଜୋର ଧରିଛି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
