ବିଜେଡିର ବରିଷ୍ଠ ଉପସଭାପତି ତଥା ଖଣ୍ଡପଡ଼ା ବିଧାୟକ ସୌମ୍ୟ ରଞ୍ଜନ ପଟ୍ଟନାୟକଙ୍କ ‘ଜନ୍ମଦିନ ଅନୁଚିନ୍ତା’ ଶୀର୍ଷକ ଲେଖାକୁ ନେଇ ରାଜ୍ୟ ରାଜନୀତିରେ ଉଷ୍ମତା ବୃଦ୍ଧି ପାଇଥିବାବେଳେ କଂଗ୍ରେସର ବିଧାୟକ ଦଳ ନେତା ନରସିଂହ ମିଶ୍ର ଓ ବିଜେପି ସାଂସଦ ଅପରାଜିତା ଷଡ଼ଙ୍ଗୀ ତାଙ୍କ ସମର୍ଥନରେ ଆଗକୁ ଆସିଛନ୍ତି । ଶ୍ରୀ ପଟ୍ଟନାୟକ ନିଜ ଲେଖା ମାଧ୍ୟମରେ ଯେଉଁସବୁ ପ୍ରସଙ୍ଗ ଉଠାଇଛନ୍ତି ସେଥିରେ କଂଗ୍ରେସ ନେତା ଶ୍ରୀ ମିଶ୍ର ଓ ବିଜେପି ନେତ୍ରୀ ଶ୍ରୀମତୀ ଷଡ଼ଙ୍ଗୀ ସମ୍ମତି ପ୍ରଦାନ କରି ସରକାରୀ ବ୍ୟବସ୍ଥା ଉପରେ ପ୍ରଶ୍ନ ଉଠାଇଛନ୍ତି । ତେବେ ସୌମ୍ୟଙ୍କ ଦଳ ବିଜେଡି ପକ୍ଷରୁ ଏପର୍ଯ୍ୟନ୍ତ କେହି ଆନୁଷ୍ଠାନିକ ଭାବେ ମୁହଁ ଖୋଲିନାହାନ୍ତି । ଯଦିଓ ଖଣ୍ଡପଡ଼ାର ପୂର୍ବତନ ବିଧାୟକ ତଥା ବିଜେଡି ମୁଖପାତ୍ର ଅନୁଭବ ପଟ୍ଟନାୟକ ଚିରାଚରିତ ଢଙ୍ଗରେ ସୌମ୍ୟଙ୍କୁ ବ୍ୟକ୍ତିଗତସ୍ତରରେ କୁତ୍ସାରଟନା କରିଛନ୍ତି ମାତ୍ର ସେ ଉଠାଇଥିବା ପ୍ରସଙ୍ଗରେ ମୁହଁ ଖୋଲିନାହାନ୍ତି । ବିଜେଡି ବିଧାୟକ ରାଜକିଶୋର ଦାସ ମଧ୍ୟ ଅନୁରୂପ ଭାବେ ଫାଇଭ-ଟି ସଚିବ ଜିଲ୍ଲା ଗସ୍ତବେଳେ ତାଙ୍କୁ ସାଧାରଣ ଲୋକେ ସ୍ୱତଃ ଭେଟିବାକୁ ଆସୁଛନ୍ତି ବୋଲି କହି ଅନ୍ୟ ପ୍ରସଙ୍ଗକୁ ଏଡ଼ାଇ ଯାଇଛନ୍ତି ।
କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି ଯେ, ସୌମ୍ୟ ପଟ୍ଟନାୟକ ଠିକ୍ କଥା କହିଛନ୍ତି । ଆଗ ମାଟି ତା’ପରେ ପାର୍ଟି । ପୂର୍ବରୁ ସେ ମନ୍ତ୍ରୀ ବଡ଼ ନା ସଚିବ ବଡ଼ ପ୍ରସଙ୍ଗ ଉଠାଇଥିଲେ । ସଚିବଙ୍କ ଗସ୍ତବେଳେ ରାଜ୍ୟ ରାଜକୋଷରୁ ବିପୁଳ ପରିମାଣର ଅର୍ଥ ଖର୍ଚ୍ଚ ହେଉଛି, ଏଥିରେ ତିଳେମାତ୍ର ସନ୍ଦେହ ନାହିଁ । ଲୋକଙ୍କୁ ଖାଇବାକୁ ଦିଆଯାଉଛି, ଗାଡ଼ିରେ ସଭାସ୍ଥଳକୁ ଅଣାଯାଉଛି ଏପରିକି ଜିଲ୍ଲା ବାହାରର ଲୋକଙ୍କୁ ମଧ୍ୟ କାର୍ଯ୍ୟକ୍ରମ ସ୍ଥଳକୁ ଅଣାଯାଉଛି ବୋଲି ଶ୍ରୀ ମିଶ୍ର କହିଛନ୍ତି ।
Also Read
ସେହିପରି ବିଜେପି ସାଂସଦ ଅପରାଜିତା ଷଡ଼ଙ୍ଗୀ କହିଛନ୍ତି ଯେ,ସୌମ୍ୟ ପଟ୍ଟନାୟକ ଯେଉଁ ପ୍ରଶ୍ନ ଉଠାଇଛନ୍ତି ତାହା ପୂର୍ବରୁ ମଧ୍ୟ ଉଠାଯାଇଛି । ଏହି ଚର୍ଚ୍ଚା ଏବେ ରାଜ୍ୟର ସବୁ ଜିଲ୍ଲାର ପ୍ରତ୍ୟେକ ଗାଁ ଓ ବଜାରରେ ହେଉଛି । ଲୋକେ ପଚାରୁଛନ୍ତି ମୁଖ୍ୟମନ୍ତ୍ରୀ କିଏ? ଯଦି ମୁଖ୍ୟମନ୍ତ୍ରୀ ନିଜେ ଜିଲ୍ଲା ଗସ୍ତରେ ଯାଉଥାନ୍ତେ ତା’ହେଲେ ସୁନ୍ଦର ହେଉଥାନ୍ତା । ଜଣେ ସଚିବ ପାହ୍ୟାର ସରକାରୀ କର୍ମଚାରୀ ହେଲିକପ୍ଟରରେ ବିଭିନ୍ନ ଜିଲ୍ଲା ବୁଲୁଛନ୍ତି । ଓଡ଼ିଶା ଗୋଟିଏ ଗରିବ ରାଜ୍ୟ ଓ ତାଙ୍କ ଗସ୍ତ ପାଇଁ ଏତେ ଟଙ୍କା ଖର୍ଚ୍ଚ ହେବା କଦାପି ଗ୍ରହଣୀୟ ନୁହେଁ । ଏଠି ତ ଓଡ଼ିଶା ସରକାରଙ୍କ ମନ୍ତ୍ରୀ ଓ ବିଧାୟକମାନେ ବି ଅସହାୟ ହୋଇପଡ଼ିଛନ୍ତି ବୋଲି ସେ କଟାକ୍ଷ କରିଛନ୍ତି ।
ସୂଚନାଯୋଗ୍ୟ, ଶ୍ରୀ ପଟ୍ଟନାୟକ ନିଜ ଲେଖା ମାଧ୍ୟମରେ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବଙ୍କ ଜିଲ୍ଲା ଗସ୍ତର ଆବଶ୍ୟକତା ଓ ଏଥିପାଇଁ ୩୦୦କୋଟି ଟଙ୍କାରୁ ଅଧିକ ଖର୍ଚ୍ଚ ହେବ ବୋଲି ଆକଳନ କରିବା ସହ କଡ଼ା ସମାଲୋଚନା କରିଛନ୍ତି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
